પ્રિય ઉત્તરસંડા કેળવણી મંડળ પરિવાર,

ઉત્તરસંડા કેળવણી મંડળની આ નવી વેબસાઇટ પર આપ સૌનું હાર્દિક સ્વાગત કરતા મને અત્યંત આનંદ અને ગર્વની લાગણી થાય છે. આપણા મંડળનો ઇતિહાસ ખૂબ જ સમૃદ્ધ અને પ્રેરણાદાયક રહ્યો છે. ૧૯૧૨ માં ઉત્તરસંડા ગામમાં પહેલી સ્કૂલની સ્થાપના થઈ અને ત્યારથી લઈને આજ દિન સુધી, શિક્ષણ ક્ષેત્રે આપણે અનેક સીમાચિહ્નો સર કર્યા છે. ૧૯૩૬ માં મેટ્રિક સુધીનું શિક્ષણ આપતી 'ધી કોરોનેશન હાઇસ્કૂલ" નું બિલ્ડિંગ બન્યું. ૧૯૫૦ માં ભારત સ્વતંત્ર બન્યું, ત્યારે તેનું નામ 'ભારત હાઇસ્કૂલ" રાખવામાં આવ્યું. આ શાળાનું એલ્યુમની એસોસિએશન પણ ૧૯૫૪ માં બન્યું હતું. ભારત હાઇસ્કૂલ, શ્રીમતી મણીબેન ચુનીભાઈ પ્રાથમિક શાળા, આઈ.જે. પટેલ કન્યા વિદ્યાલય, અને એમ.આઈ. પટેલ ઇંગ્લિશ મિડિયમ સ્કૂલ જેવી સંસ્થાઓ દ્વારા આપણે પેઢી દર પેઢી શિક્ષણની જ્યોત પ્રજ્વલિત રાખી છે. હું, ઇશીત પટેલ, ઉત્તરસંડા કેળવણી મંડળના નવનિયુક્ત પ્રમુખ તરીકે, અને ઉત્તરસંડા ગામના પૂર્વ સરપંચ તરીકે, આ ઐતિહાસિક ક્ષણે આપ સૌનો આભાર વ્યક્ત કરું છું. તાજેતરમાં જ મંડળનું સંચાલન યુવાન અને ઉત્સાહી ટ્રસ્ટીઓના હાથમાં આવ્યું છે, અને આ નવી ટીમ સાથે મળીને, આપણે આપણા મંડળને નવી ઊંચાઈઓ પર લઈ જવા કટિબદ્ધ છીએ. અમારો મુખ્ય ઉદ્દેશ્ય આપણી શાળાઓને આધુનિક સુવિધાઓથી સજ્જ કરીને, આપણા વિદ્યાર્થીઓને શ્રેષ્ઠ અને ગુણવત્તાયુક્ત શિક્ષણ પૂરું પાડવાનો છે.

આ વેબસાઇટ આપણા મંડળની પ્રગતિનું પ્રતિક છે. ખાસ કરીને, એલ્યુમની વિભાગ ભૂતપૂર્વ વિદ્યાર્થીઓ માટે એક મજબૂત સેતુ બનશે, જ્યાં તેઓ એકબીજા સાથે જોડાઈ શકશે, યાદો તાજી કરી શકશે, અને મંડળની પ્રવૃત્તિઓમાં સક્રિયપણે ભાગ લઈ શકશે. આ વેબસાઇટ દ્વારા, તમે મંડળને દાન પણ આપી શકશો, જે આપણા શૈક્ષણિક કાર્યોને આગળ ધપાવવા માટે અત્યંત મહત્વપૂર્ણ છે.